Ipatawag sa Committee on games and amusement sa konseho ning dakbayan ang mga tinugyanan sa Philippine Charity Sweepstakes Office o PCSO apil na sa Philippine National Police (PNP) ug uban pang ahensya sa gobierno may kalambigitan sa illegal nga sugal dinhi sa Cagayan de Oro. Ang lakang himuon tapos gibulgar ni Presidente Rodrigo Duterte nga dili masumpo ang illegal nga sugal nga karibal sa PCSO games tungod sa proteksyon sa military ug police officials sa syudad.
Matud pa ni Konsehal Roger Abaday, ang chairman sa maong committee nga maoy tumong sa maong imbestigasyon ang pagsuta kon kinsa gayod ang mga protectors sa illegal nga pasugal nga nakaapekto sa mga pagpadula sa PCSO.
Nasayran nga wla ipabalik sa pamuno-nasud ang pagpadula sa PCSO sa Small Town Lottery o STL, Peryahan ng Bayan ug Keno kay nahimo naman hinuon kining tinubdan sa kurapsyon.
Sa pikas bahin, giangkon ni Police Regional Office 10 spokesperson Police Lt. Col Mardi Hortillosa nga dili limpyo ang ilang ahensya pag-abot sa pasangil may kalambigitan ang illegal nga pasugal.
Matud ni Hortillosa, dugay na nga napasanginlan ang pipila nila ka kauban sa illegal nga pasugal apan walay makabarog aron pamatud-an ug sila kasuhan.
Hangtud sa pagsulat ning maong taho, wala pay bisan usa ka police nga gireklamo ug gikasuhan tungod sa maong akusasyon, dugang pa ni Hortillosa.