CAGAYAN DE ORO CITY – Lain-lain ang reakyon sa mga abogado ug politiko sa planong pagpagula sa Malacañang sa listahan sa narco-politicians sa dili pa ang piliay.
Si Atty. James Judith, kandidato pagkakonsehal sa syudad sa Cagayan de Oro nagsugilon nga unlawful o supak sa balaod ang pagpagula sa publiko sa narco-list tungod kay kini nagkinahanglan man sa due process. Matud niya, mouyon siya sa maong lakang kon ang mga nalista na adunay pending cases sa korte tungod kay matud niya, ang korte lamang ang makadeterminar kon ang usa ka tawo guilty o dili. Nabalaka usab siya nga kon kini mapagula sa publiko, magamit kini sa kaatbang sa politiko pagguba sa hingtungdang kandidatura.
Laing abogado nga si Adonis Gumahad nga ang presumption of innocence usa ka batakang balaod, mao nga siya nagtuo nga mas maayo una nga ipasang-at una ang kaso sa hingtungdan bisan sa fiscal level man lamang.
Sa pikas bahin, si Lieutenant Colonel Mardy Hortillosa, spokesperson sa Cagayan de Oro City Police Office nagsugilon nga anga pagpagula sa marco-list maoy maghatag giya sa mga botante kon kinsa ang botohan o dili. Hinuon, wala siya magtuo nga adunay mga lokal nga kandidato dinhi sa Cagayan de Oro nga nahiapil sa maong listahan. Apan sa iyang kabahin, si Mayoral Candidate Jose Gabriel “Pompee” La Viña uyon sa pagpagula sa maong listahan aron nga ang katawhan masayod sa kamatuoran, matud pa ni La Viña.