Gipahigayon buntag, Mayo 17, 2022 ang “Special Program for the Employment of Students (SPES) Orientation” ilawom sa pagpasiugda sa Public Employment Service Office (PESO) sa pagdumala ni PESO Manager, Carlo Deloria ning siyudad.
Ang nasangpit nga kalihokan ang dinha gipahigayon sa ground floor, sa Museo Dipolog tinambongan sa dul-an sa 200 ka mga kabatan-onang mga magtutungha gikan sa High School, Senior High School, kolehiyo ug Out-of-School Youths, kinsa nagtinguha pa nga motungha sa sunod tiuig ting-tungha.
Sigun sa dugang nasayran gikan kang PESO Manager Deloria, nga ang SPES Program maoy usa ka programa sa atong nasudnong kagamhanan kaniadto pa pinaagi sa Department of Labor and Employment (DOLE) alang sa mga kabatan-onang nagtungha, diin sila ang makapahimulos sa 20 ka adlaw nga trabaho nga magasugod sa Mayo 17 hangtud na sa Hunyo 6, ning tuiga, ilawom sa superbisyon sa ilang matag barangay diin sila nagagikan, ug ang suholan niini ang nagagikan sa DOLE ang 60%, samtang ang 40% usab ang paga-abagahon sa kagamhanang lokal ning siyudad.
Sumala pa nga kining maong programa ang hugtanong gisuportahan sa kagamhanang lokal ning siyudad ilawom sa kasamtangang liderato ni Mayor Darel Uy, aron sa paghatag usab og kahigayonan ngadto sa atong mga kabatan-onang gusto motrabaho, diin ang ilang suholan nga madawat gikan niini ang makatabang ngadto sa kanila ug sa ilang mga pamilya.
Karong tuiga, 220 ka slots ang gihatag ngadto sa kagamhanang lokal ning siyudad alang ning maong kahigayonan.
Nahimong bisita si City Mayor Darel Dexter T. Uy, kinsa mipaabot sa iyang undanong mensahe ngadto sa mga kabatan-onang motrabaho, ilabi dinha sa pagdasig kanila nga magkugi isip ilang pagbansay alang sa ilang pagpanarbaho sa umaabot nga mga adlaw.
Matud pa sa batan-ong mayor ngadto sa grupo sa mga kabatan-onan, nga ang pagkugi uban sa pag-ampo ngadto sa Dios mao ang maghatag kanila sa kalamposan dinha sa pagpanginabuhi.
Mipahigayon sa Orientation proper mao ang duha (2) ka mga personahe isip mga focal persons gikan sa Department of Labor and Employment nga mao sila si Ms. Megajane S. Ligutom ug Mr. Vince John Lerry B. Culaste, tanan dinhi sa dakbayan.
(Source: Dipolog City Government Facebook page)