Gisulayan unta pagdala sa tambalanan apan nabugtuan gyud sa kinabuhi ang usa ka lalaki nga nagtrabaho sa Cebu Cordova Link Expressway.
Ang maong aksidenti nahitabo pasado alas 8:00 gahapon sa buntag Agusto 27, 2022 didto sa Brgy. Pilipog, Lungsod sa Cordova.
Giila sa kapulisan ang biktima nga si Jonas Batistis, 31 anyos ang panuigon, lumolupyo sa sitio Indian, Brgy. T. Padilla syudad sa Sugbo.
Segon sa kapulisan sa lungsod sa Cordova nga ni respondi sa maong panghitabo nga ang biktima nagtrabaho isip usa ka steelman sa Cebu Link Joint Venture Company.
Sa maong oras nagtrabaho sila sa maong taytayan apan aksidenteng nahugno ang damba nga gipatungan niini nga ni resulta sa iyang pagkahulog.
Adunay gitas-on nga 70 metros ang gihagbungan nga naigo sa konkreto sa bahin sa tulay nga maoy gikamatyan sa biktima.
Si Police Corporal Gerson Futulan nga maoy nag imbestigar sa maong hitabo nga matud pa sa safety officer sa maong kumpanya nga gi tangtang ang safety harness ni Batistis atol sa maong panghitabo.
Mahinumdoman nga ikaduha na kini ka higayon nga adunay namatay atol sa pagtrabaho sa CCLEX. Sa maong panghitabo nagpahinumdom ang kapulisan ngadto sa mga trabahante nga bisan unsa nga klasi nga trabaho kanunay unahon ang safety sa kinabuhi.
Sa pagkakaron padayon ang imbestigasyon sa kapulisan sa lungsod sa Cordova sa kamatayon ni Batistis. Gitan-aw usab sa kapulisan kung wala bay foul play nga nahitabo sa maong aksidente sa taytayan.
(Source: Cordova Police Station via RSL)