Kalisang ug kakurat ang misugat sa mga residente sa Barangay Duljo-Fatima, Cebu City atol sa kasaulogan sa Pasko.
Gilamoy sa kayo ang mga pinuy-anan nga gama sa light materials nga nahimutang sa Sitio Mansanitas, Buli, Catwalk, San Pedro ug Sitio Plastikan, dapit sa Spoliarium Street, Barangay Duljo-Fatima sa nahisgutang siyudad.
Nadawat sa fire department ang alarma sa sunog mga 3:47 sa kaadlawon niadtong Martes, December 25, 2018 ug nakontrolar ang sunog sa mga alas 6:25 sa kabuntagon.
Usa ka dose anyos nga batang lalaki nga giila nga si Cyrus John Peras ang nakalas atol sa maong sunog. Nasayran sa pasiunang pakisusi sa fire department nga nagduwa og Dota sulod sa internet cafe ang biktima sa dihang mi-ulbo ang sunog.
Gibanabana ni Cebu City Fire Marshall Chief Inspector Noel Nelson Ababon nga mokabat sa 3 milyones pesos kapin ang kadaut sa sunog.
Giangkon sa City Fire Marshall nga naglisod gyod sila pagpawong dayon sa kayo gumikan sa kahagip-ot sa mga interior roads. Gisusi usab karon sa mga arson investigators ang nadawat nila nga report nga nagsugod and kayo sa usa ka gibiyaan nga pinuy-anan nga giingong gigamit nga suyopanan sa mga drug addicts sa nahisgutang barangay.