Mag-atubang sa multa o’ silot ang mga establisemento nga nag-operate nga walay business permit.
Kini ang pahinumdum sa Regulatory Compliance Board (RCB) human nagpahigayon ning bag-o sa joint inspection and monitoring aron pagsiguro nga lehitimo ang operasyon sa mga business establishments ning syudad.
Apan nasayran sa RCB, ubos ni RCB Chairman Atty. Jose Edgardo Uy ug RCB Inspectorate Team Leader Antonio Resma Jr., nga aduna pa gihapon mga tindahan nga nag-operate nga walay business permit o’ kaha expired na ang permit.
Tungod niini, gipahinumduman sa RCB ang nasangpit nga mga establisemento nga kinahanglan maglukat og business permit aron malikayan ang multa nga ipahamtang sa city hall.
Mitanyag usab ang RCB og assistance ngadto sa mga business owners aron mas mapasayon ang mga transaksyon pinaagi sa paghatag sa listahan sa mga rekisitos ug pagpahibalo sa mga proseso nga agian kung maglukat sa business permit.
Sa laing bahin, nasapon sa mga sakop sa RCB ang pipila ka mga indibidwal nga nakalapas sa ‘no drinking in public places policy’, ug gi-imbargo ang mga ilimnon makahubog atol sa random inspection.
Kahinumduman nga usa ka ordinansa sa syudad ang nagmando sa pagpatuman sa minimum public health standards, lakip ang pagdili sa pag-inom diha sa mga pampublikong lugar sama sa daplin sa kadalanan, plaza, tulay, ug uban pang susamang lugar.
Source: CIO, Cagayan de Oro