Naangkon sa contingent sa Barangay Macabalan ang premyo nga P150,000 human mikampeyon sa gipahigayon nga Carnival Street Dance Competition Biyernes, Agosto 26, 2022, sa Pelaez Sports Center nga usa sa mga core events sa Higalaay Festival 2022.
Ang ikaduhang dapit nakuha sa grupo sa Barangay Kauswagan diin nakadawat kini og ₱ 90,000.00, samtang ang Barangay Puerto usab ang misakmit sa ikatulong dapit ug premyo nga ₱ 65,000.00.
Gawas sa cash prize, nakadawat usab og trophy ang tulo ka mga mananaog. Samtang gihakot sa Brgy. Macabalan ang duha sa tulo ka mga special awards nga ‘Best in Costume’ ug ‘Most Festive Group’. Matag special awards adunay ganti nga ₱ 10 mil.
Ang festival king sa Brgy. Macabalan ang nakakuha sa titulo nga ‘Higalaay Carnival King’, samtang ang nahimong ‘Higalaay Carnival Queen’ mao ang festival queen sa Brgy. Puerto. Sila nakadawat og tagduha ka roundtrip tickets gikan sa Air Asia ug ₱ 6 mil nga premyo.
Ang festival king sa Brgy. Puerto ang nakakuha sa ikaduhang dapit ug gisundan sa Brgy. Kauswagan alang sa ikatulong dapit uban ang premyo nga ₱ 3 mil ug ₱ 2 mil. Nakuha usab sa festival queen sa Brgy. Macabalan ang ikaduhang dapit, samtang ang ikatulong dapit mao ang Brgy. Kauswagan nga nakadawat og premyo nga ₱ 3 mil ug ₱ 2 mil.
Ang Carnival Street Dance Competition 2022 giapilan sa 10 ka mga contingents gikan sa Barangay Carmen,Tablon, Puerto, Iponan, Kauswagan, Bugo, Patag, F.S. Catanico, Consolacion, ug Macabalan.
Nagpadayag sa iyang kalipay si City Councilor Jay Roa Pascual, committee chair sa tourism nga nakabalik na ang in-person nga pagpahigayon sa Carnival Street Dance Competition human sa duha ka tuig nga wala kini gihimo sa atol Kapistahan sa Cagayan de Oro tungod sa pandemya.
Samtang gipasalamatan usab ni Acting City Tourism Officer Chedilyn Aissa Dulguime ang tanan nga nagpaluyo ug nagsuporta sa kalihokan hinungdan nga nagmalampuson kini ilabina kang Mayor Rolando Klarex Uy uban sa mga sakop sa 20th City Council pinangulohan ni Vice Mayor Jocelyn Rodriguez.
(Source: CIO-Cagayan de Oro City)