Dipolog City — Gumikan sa pag-usbong sa kaso sa COVID-19 niining probinsya sa Zamboanga del Norte, nagkataas usab ang panginahanglanon niini sa mga tambal, kagamitan ingon man medical supplies nga sarang gamiton sa mga frontliners ug health workers sa mga ospital sa pagsugpo sa makatakod nga sakit.
Niini, mapasalamaton ang probinsyal nga kagamhanan tungod sa nadawat nga balor ₱ 3.5 million nga mga tambal ug medical supplies gikan sa Office of Civil Defense IX (OCD) isip suporta sa ilang request, gumikan sa miaging mga semana nagkataas ang kaso sa COVID-19.
Pipila sa mga naabot nga donasyon gikan sa OCD mao ang Antigen, Antibiotics, Vitamin C, Antihistamine, Acetylcysteine, Calciferol, Sleeping Pills, Alcohol, Coverall, Face Shield, Head Cover, Shoe Cover, Surgical Mask, Disposable Gown, ug Large Blur Vinyl.
Nasayran nga kadaghanan niini ang ihatag sa Zamboanga del Norte Medical Center gumikan kay sa maong ospital nahimutang ang mga severe cases sa COVID-19 nga kasagaran magpondo ang mga pasyente sa 15 ka adlaw o labaw pa, ingon usab exposed ang mga frontliners, sumala pa ni Mr. Alfonso Bernad, Executive Assistant IV.
Samtang, mubalor usab ug P4million ang ambulance ug mga kagamitan niini nga gihatag gikan sa Pitmaster Foundation diin gikan pa sa Manila, ug girequest usab sa probinsya.
Matud kang Mr. Bernad, gibana-bana mga mukabat na sa P10million ang kinatibuk-ang kantidad sa donasyon nga nadawat sa probinsya.
Dugang pa niya dako kaayong tabang sa nagkataas usab nga panginahanglanon sa ospital, sa pakigbatok sa COVID-19.
Nagpasalamat sila sa tanang minghatag sa ilang tabang donasyon mapa kompanya o mga indibidwal man kini tungod sa dako kaayong tabang niini.
Sa ilang mensahe sa katawhan, nanghinaot ug nag-ampo sila nga karong anaa ang probinsya sa Modified Enhanced Community Quarantine, muubos na unta ang kaso sa COVID-19 dinhi sa probinsya.
Padayon usab nila nga gipahimangnuan ang katawhan nga magpadayong magbinantayon, kung mahimo likayan ang pag gawas sa balay, ug kung dili malikayang mugawas magsuot ug face mask ug face shield, aron sa ingon magkaubos na ang kaso sa COVID-19 dinhi sa probinsya.
(News and photo courtesy of PROVINCIAL INFORMATION CENTER-ZAMBOANGA DEL NORTE Facebook page)