Gitunol sa Bureau of Fisheries and Aquatic Resources (BFAR) ngadto sa duha ka dakbayan sa Dipolog ug Dapitan ug laing siyam ka coastal municipalities dinhi sa Zamboanga del Norte ang livelihood projects sa kantidad nga ₱ 1.89 milyones ilawum sa BFAR-Special Area for Agricultural Development (SAAD) Program sa Department of Agriculture.
Kini gipahigayon sulod sa BFAR-Provincial Fishery Office sa Barangay Sta. Isabel ning dakbayan sa Dipolog kaniadtong Agosto 27, niining tuiga.
Ang Dipolog, Dapitan ug laing siyam ka lungsod nakadawat sa 22 ka 30-footer Fiberglass Reinforced Plastic (FBR) Boats uban sa 16 horse power nga makina.
Lakip sa ilang nadawat mao ang 44 sets sa tuna hook and lines, 22 sets sa pikit-pikit, ug 44 sets sa squid jigger.
Si Mr. Isidro Velayo, Jr., ang Regional Director sa BFAR Region 9, ang nagkanayon nga sa entiro Zamboanga Peninsula, ang probinsya sa Zamboanga del Norte ang bugtong resipiente sa SAAD Program sa Department of Agriculture aron matabangan nga mahaw-as sa kapobrehon ang sektor sa mag-uuma ug mananagat.
Lakip sa nadawat nga mga proyekto sa Zamboanga del Norte gikan sa maong nasyonal nga programa mao ang Establishment of Seaweed Nursery, Seaweed Input Materials Distribution, Fish Aggregating Device o payao, FBR Boats, Post Harvest Technology Demonstration ug Marine Fish Cage nga gipatuman pinaagi sa BFAR.
(Provincial Information Center/ OIC Lyza Bautista, RPN DXKD Dipolog)
