Un persona el ya muri myentras onse otro el ya iri cuando ya rebenta un bomba na bus de pasajero ayer medio dia na ciudad de Tacurong, provincia de Sultan Kudarat.
Asegun con Major General Roy Galido, comandante del 6th Infantry Division, con el muerto victima ya conose como si Gilbert Gabosa, sincuenta’y seis años el edad y residente del municipio de Carmen na provincia de Norte Cotabato.
Nohay nombra con el onse irido pasajero pero asegun con Galido cay dos del onse amo maga soldao y el nueve otro todo maga civilian.
Con el maga irido pasajero enseguidas ya lleba na sercanos hospital para el curada medical.
Asegun con Galido cay el bomba ya rebenta myentras el bus con numero 2588 del Yellow Bus Line para entra ya na parada na Purok Duranta, Barangay Poblacion na ciudad de Tacurong.
Con el bomba ya pone na atras del bus que ta carga veinte nueve pasajero durante el incidente.
El ruta del bus amo desde ciudad de Kidapawan para na ciudad de Tacurong pasando na maga municipio de M’Lang y Tulunan na provincia de Norte Cotabato.
Ya condena si Galdio con el incidente hablando un acto este de cobarderias del grupo terorista que ta pone na peligro con el vida del maga inocente vivientes y violacion de derechas humanos y ley internacional.
Si Galido ya habla cay ay ase sila todo esfuerso para sabe si quien el responsable na incidente y toma propio accion contra con el maga echor.
Myentrastanto, si Brigadier General Arturo Rojas, el comandante del Western Mindanao Command, ya habla ay continua sila intensifica con el esfuerso de seguridad para privini semehante incidente. (B. Garcia, photo courtesy of 6th Infantry Division)