Ya aresta con un soldao maga autoridad por el crimen de matansa na provincia del Zamboanga del Sur.
Si Police Colonel John Francis Encinareal, el hefe del Criminal Investigation and Detection Group-9, ya nombra con el arestao soldao como si Corporal Bryan Santander, treynta’y sinco años el edad y el numero dos wanted persona na municipio de Ganassi na provincia del Lanao del Sur.
Asegun con Encinareal cay con Santander ya aresta del Sabado denoche na Purok Kamunggay, Barangay Alegria, na ciudad de Pagadian City na provincia del Zamboanga del Sur.
Si Encinareal ya habla cay si Santander tiene pendiente orden de aresto sin piansa que ya dale el tribunal del ciudad de Marawi del Marso cuatro año dos mil deci-seis.
Ya confisca na posesion de Santander durante su aresto un pistola .9-millimeter y sincuenta’y nueve bala.
Asegun con Encinareal cay si Santander y otro soldao conosido como si Corporal Cerilo Mag-abo implicao na matansa de Sedik Lanto Tanog del Hulyo veinte dos año dos mil trese que ya resulta na plantada del asunto criminal contra canila dos.
Asegun con Encinareal cay ta ase pa enbuscada con Mag-abo quien ta esta libre hasta este tiempo. (B. Garcia, photo courtesy of Criminal Investigation and Detection Group IX)
