No menos de uno punto sinco milyones de pesos valor de propeidad el ya destrosa na kema de un restaurant del ayer madrogada alli na calle Jaldon, Barangay Canelar, este ciudad.
Asegun con el investigador del incidente, Fire Officer 1 Jimfirst Natividad, cay base na informacion del un trabajante si Maylandro Sabangan, veinte anios el edad, cay el fuego ya principia na comedor del restaurant.
Asegun con Sabangan cay ta durmi ele y su dos companieros cuando ya sinti si grueso umera y enseguidas ya llama con Omar Khan Johan, el duenio del restaurant.
Cuando ya llega si Johan, ya precura sila apaga con el fuego usando fire extinguisher pero nuway sila puede saka abante hasta ya engranda ya el fuego.
Mga bombero quien ya responde, ya puede apaga con el fuego mga alas tres cuarenta’sinco del aga.
Asegun con Natividad cay el causa del kema amo un defecto na alambre el electricidad na comedor del restaurant. (April Boy Regino)
