Un persona ta enfrenta asunto de robo na jusgado ya aresta el pulisiya mga alias dies del aga ayer alli na Barangay Tugbungan, este ciudad.
Si Major Francis Briones, hefe del Police Station 11, ya nombra con el aresta suspechao como si Junober Janeo Carabuena, treynta’y siete anios el edad y residente de Purok siete, Sitio Urban poor, Barangay Tugbungan.
Asegun con Briones cay si Carabuena tiene pendiente order de aresta por el asunto de robo con recomendao pinasa de cuarenta mil de pesos. (April Boy Regino)