Un infamoso senior lider del New People’s Army (NPA) con 30 pendiente orden de aresto el ya muri na un tirahan contra con mga soldao na provincia del Zamboanga del Sur, asegun con el militar del Miercoles.
Si Brigadier General Elmer Suderio, el comandante del 102nd Infantry Brigade, ya nombra conel muerto senior lider del NPA como si Aprecia Rosete alias Ka Bambam, el lider regional del rebelde NPA bajo el Western Mindanao Regional Party Committee.
Asegun con Suderio, el tirahan ya ocuri na Barangay Malagalad, Dumingag, Zamboanga del Sur del Martes.
Asegun con Suderio, el tirahan ya principia cuando el mga soldao ya columbra con un grupo de rebelde NPA mientras ta conduci ofensiva na Barangay Malagalad municipio de Dumingag.
Si Suderio ya habla cay si Rosete, quien un nativo de Agusan del Sur, tiene 30 pendiente orden de aresto como el cabesa pensante del mga bien mal acto na Zamboanga Peninsula, incluido extorsion con mga negociantes, mga sin sentido matansa del mga inocente civilian, y destructivo sabotage del mga importante proyectos de infrastractura.
Si Suderio ya habla ya recubri na lugar del tirahan un rifle Ak-47 y calibre .45 pistola con mga bala, y mga cosas personal del defunta Rosete.
Si Tiniente Coronel Terrence Ylanan, el comandante del 53rd Infantry Battalion (IB) y Task Unit Terminator, ya asegura el digno ayuda para na intiero de Rosete y locando con su familia na Agusan del Sur.
“Ay asegura came cay ay dale propio attencion con respeto con el resto de Aprecia y devolvido na su familia,” si Ylanan ya habla.
Si Suderio ya comenda con el mga tropa del 53IB por el de ila dedicacion y valentia ante el peligro mientras ta expresa dolor por el perdicion de un vida.
(B. Garcia, photo courtesy by 102nd Infantry Brigade)