El pulisiya ya aresta con un conosido suspechao drug pusher na un campanya contra droga ilegal alla na municipio de Siay, Zamboanga Sibugay.
El Coronel albert Larubis, Zamboanga Sibugay police director, ya nombra con el suspechao como si Dionisio Dela Cruz, Hijo, treynta’y dos anios el edad.
Asegun con Larubis cay con Dela Cruz ya aresta na un buy-bust operation mga alas dose dies enantes aga alla na Barangay Maniha, municipio de Siay.
Si Larubis ya habla cay ya puede recubri na posesyon de Dela Cruz sinco diutay pakete de suspechao shabu con el cantidad de cuatro mil siete sientos pesos, un cellphone, y quinientos pesos markao sen.
Si Dela Cruz detenido ahora na quartel del pulisiya na Siay myentras ta prepara el mga necesaryo documentos para planta formal asunto contra con ele. (Bong Garcia)