Como pare del esfuerso del govierno para atra-e mga terorista rindi, el Bangsamoro Autonomous Region in Muslim Mindanao (BARMM) ya dale ayuda financial y comida con veinte cuatro antes myembros de Dawlah Islamiya-Maute Group alla na Lanao del Sur.
Asegun con el 103rd Infantry Brigade cay el ayuda ya dale por medio del Proyecto TUGON o tulong ng Gobyernong Nagmamalasakit del Ministro de Interior y Govierno Local del BARMM.
Asegun cay el programa un proyecto del MILG-BARMM para dale el cosa ta necesita el antes mga terorista myentras ta bira sila na sociedad y vivi en paz hunto con el de ila cada’y cual familya.
Cada uno del veinte cuatro antes myembro del Dawlah Islamiya ya recivi sinco mil de pesos, un sako de sincuenta kilo aros y un gallon de alcohol.
Asegun con Michael Laguilay, el public safety division chief of MILg-Lanao del Sur, cay por medio del programa ta puede sila determina si cosa intevencion el puede sila dale para alivia el vida del mga estaba terorista.
Asegun tamen con Zaide Amel, TuGON project manager, ay continua sila distribuji ayuda con mga antes terorista para atra-e con el losdemas myembros del Dawlah Islmiya rindi y vive en paz con harmoniya hunto con el de ila familya. (Bong Garcia)