Maga tropa del Joint Task Force Tawi-Tawi hunto con maga personajes del 3rd Boat Attack Division ya salva con nueve pasajeros y tres tripulantes del un lancha que ya man aberiya na medio’y mar na provincia de Tawi-Tawi.
Asegun con Brigadier General Romeo Racadio, el comandante de Joint Task Force Tawi-Tawi, cay con el maga pasajeros y tripulantes del M/L Suratulya ya salva maga tropa del Domingo na vicinidad de Isla de Pababag, Bongao, Tawi-Tawi.
Con el maga salvao pasajeros ya conose como el maga siguientes: Roaida Sabdani, sesenta’y tres años; Jhuddin Sabdani, cuarenta’y dos; Marry Joy Boncales Sabdani, treynta’y ocho; Shamarah Sabdani, cuatro años; Ralph Vincent Sabdani, deci-ocho; Kayle Sabdani, veinte; Amy Burugan, veinte siete; Sitti Mariam Tandiko, veinte dos; y si Bernie Giray Ambay, treynta’s cuatro años todo maga native del Barangay Tubig Indangan, Simunul, Tawi-Tawi y presentamente allay a na region de Visayas ta esta.
Con el maga salvao tripulantes ya conose como canda Romulo Colecio, treynta’y tres; Jhuddin Mohammadalah, veinte tres; y so Gordo Mali, cuarenta años el edad y todo maga residentes del Barangay Tubig Indangan, na municipio de Simunul.
Asegun cay el maga pasajeros estaba visita con el de ila maga parientes na municipio de Simunul y ta viaja para na municipio de Bongao para munta eroplano para birada na Cebu cuando ya keda malo el makina del lancha y ya man anud para na isla de Pababag.
Si Racadio ya comenda con el maga tropa por el de ila enseguidas accion que ya resulta na salvada del maga pasajeros y tripulantes del M/L Suratulya.
Con el maga salvao pasajeros y tripulantes ya dale ayuda medical y despues ya lleba canila para na de ila destinacion myentras ya deja con el lancha na vicinidad de isla de Pababag.
Con el lancha ay compone el momento ay esta ya calma el tiempo. (Bong Garcia, Jr.) (Photo Courtesy of Joint Task Force Tawi-Tawi)