El Marine Battalion Landing Team-1 (MBLT-1) ya distribui y ya demonstra sobre el usada del purificador balde de agua na provincia de Tawi-Tawi, asegun con el militar del Lunes.
Asegun con el 4th Civil Relations Group (4CRG), el purificador de balde, que ya dale el Waves 4 Water Philippines, ya distribui del otro semana con mga identificao recipientes na Rosemin Gymnasium na Barangay Batu-Batu, Panglima Sugala, Tawi-Tawi.
Asegun con el 4CRG, despues del distribucion, ya conduci demostracion el mga soldao marino para dale mira con el mga recipientes el propio usada del purificador de balde.
“El iniciativo tiene el objetivo para proporciona limpio agua y enseña con el comunidad local si quemodo ta usa con el purificador de agua, permitiendo canila para converti agua insegurao para na agua potable,” el 4CRG ya habla.
El dos actividades coincidido con el aka-66 aniversario de fundacion del municipio de Panglima Sugala, descatando el significancia del celebracion.
Asegun con el 4CRG, el Alcalde Nurbert Sahali del Panglima Sugala ya suporta con el dos actividades, que ya atende el mga oficiales desde varias barangay dentro del municipio.
El 4CRG ya habla, el actividades es en liña del operacion del 2nd Marine Brigade para promove el desarollo de socio-economico na provincia del Tawi-Tawi. (B. Garcia)