Tres soldao ya muri na encuentro contra con maga mal elementos del sociedad Huwebes tarde na Barangay Magcawa, municipio de Al-Barka, provincia de Basilan.
Asegun con Brigadier General Domingo Gobway, comandante del 101st Infantry Brigade, cay el maga soldao del Charlie Company bajo del 18th Infantry Battalion de camino para releba con el maga tropa na Hill 510 detachment cuando ya man tirahan sila pati el grupo de Abaas Jangkatan maga ala una y media del tarde.
Asegun con Gobway cay el tirahan ya alcansa dies minutos que ya resulta na muerte del tres soldao.
El grupo de Jangkatan ya istindi para na direccion del Barangay Baguindan na municipio de Tipo-Tipo.
Si Gobway nohay nombra con el maga muerto soldao cay necesita notifica una con el de ila maga familya antes de publica de ila maga nombre.
Cavo or corporal el ranggo del uno del tres muerto soldao myentras el otro dos among maga Private First Class.
Maga soldao del 18th Infantry Battalion bajo el liderato de Tiniente Coronel Cyril Santander ta ase apas ahora con el grupo de Jangkatan. (Bong Garcia, Jr., photo courtesy of Ronda del Basilan)