Tres personas muerto myentras tres otro el arestao despues de veinte minutos tirahan durante un campanya contra droga ilegal na municipio del Tandubas alla na provincia del Tawi-Tawi.
El pulisiya del municipio de Tandubas ya nombra con el tres muerto como canda Nurhamin Madnur, cuarenta’y tres anios el edad, Mohammad Al Sangogot, veinte siete anios y un tal Billy.
Con el maga arestao ya conose como canda Alhamin Sangogot, deci-ocho anios, Alman Ladjabassal, deci-ocho, y si Adin Nur, treynta’y uno anios el edad.
Asegun con el pulisiya cay el veinte minutos tirahan ya ocuri cuando maga suspechao ya tira con el maga pulis durante un campanya contra droga ilegal del Domingo alla na Barangay Kakoong, Tandubas.
Nohay ni uno ya muri o iri na lao del maga pulis del Tandubas y Tawi-Tawi provincial mobile force company quien ya conduci el campanya contra droga ilegal.
Maga pulis ya recubri na hideout del maga suspechao mas de ssesenta’ nueve gramos de shabu que tiene el valor de mas de tresientos sincuenta’y nueve mil pesos, ocho rollo de aluminum foil, dos mil siete sientos ocho pesos sen, y maga pusil de diferentes altra calibre, dos granada, y maga bala de difrerente calibre.
Con el tres arestao suspecchao ya detene myentras con el resto del tres muerto ya lleval na hospital y despues ya entrega con el de ila cada’y cual familya.
El General Arthur Cabalona, el director del pulisiya na rehyon autonomo, ya comenda con el maga pulis por el buen resulta del campanya contra droga ilegal.
Si Cabalona ya habla cay su mando ay continua intensifica el campanya contra criminalidad and droga ilegal na lugar ta cubri su mando. (Bong Garcia)