El Task Force Karne del gobierno del ciudad ya conseja con el mga consumidores para patroniza lang con el mga tienda donde en exhibicion el certifico de inspeccion de carne para el dia o disponible bajo el necesidad.
El task force ya dale el consejo cay ya resumi ya sila del Jueves el conducida del post-meat establishment inspection (PMEI) na ciudad.
Si Dr. Portia Quintas, el jefe del servicios de inspeccion de carne del Oficina del Veterinario del Ciudad, o OCVet, ya encabesa con el conducida del inspeccion en colaboracion con Geovannie Roy Quintas, quien ta encabesa con el aplicacion del servicio nacional de inspeccion de carne.
El iniciativa ya asegura con el mga consumidores cay limpio el carne que ta compra sila, y carne segurao desde varias establicimiento de carne na ciudad de Zamboanga,” si Quintas ya habla.
Si Quintas ya habla, el inspeccion ya cubri con el mga barrios de Putik, Mercedes, Divisoria, Lumbangan, Culianan, y Boalan.
Asegun con Quintas, el inspeccion amo para asegura tamen cay todo carne ta vende tiene certifico del inspeccion de carne.
El certifico del inspeccion de carne ya dale el mga inspector designao na mga matadero para acompania con el carne que ta vende na mga tienda.
El trabajo del Task Force Karne amo para bisia el implementacion y cumplimiento del Ordinansa del Ciudad Numero 2017-178, o mas conocido como el amendao Codigo de Inspeccion de Carne del Ciudad de Zamboanga.
El ordinansa ta diriji conduci operacion de control posterior del establicimiento de carne para regula el flujo, preparacion, y vendida del carne y productos de carne para consumo humano.
El ordinansa ta dale acceso con el OCVet na todo establicimiento de carne, tiangge de carne y establicimiento de comida y el autoridad examina y inspecciona todo carne y productos de carne, poltry y productos de poltry preparao para comercio. (B. Garcia)