El suspechao na un incidente de tiro ya rindi na otoridad un dia despues del incidente, el pulisiya local ya anuncia del Biyernes.
Si Ruben Coros, el barrio capitan del Barangay Bolong, ya entraga con el suspechao na ZCPS3 maga alas 11:15 enantes aga (dia de Biyernes) despues que ya rindi conele el alegao echor del inciente.
El ZCPS3 ya nombra con el suspechao como si Prince Santos Falcasantos, 26 años el edad y residente de Sitio Mangga, Barangay Bolong, este ciudad.
Asegun con el ZCPS3 cay si Falcasantos amo el suspechao na matansa de Lloyd Erigbuagas, 42 anos el edad del Huwebes madrogada na Purok 4, Barangay Bolong.
De camino si Erigbuagas pa bolbida na su residencia estaba na un velacion cuando ya tira con ele el suspechao.
Con Eribguagas ya tupa el tiro na pescueso que ya causa su enseguidas muerte.
Ya recubri tres capsula de calibre .45 pistola na lugar del crimen.
Asegun con el ZCPS3 cay el motivo del incidente es un agravio personal y relatao na droga ilegal.
Detenido ahora si Falcasantos na quartel del ZCPS3 en preparacion para el plantada del asunto criminal encontra conele. (B. Garcia, photo courtesy of ZCPS3)