Tres personas ya sufri kemadura na cuerpo cuando ya kema el un “speedboat” ta munta sila aqui na ciudad de Zamboanga.
El Zamboanga City Police Station 11 (ZCPS11) ya nombra con el tres victima como canda Hamid Suani, 62 años, el maestro patron del jungkung, y su dos pasajeros, canda Ambek Talib, 27 y Al-Kasibi Talib, 24 años el edad.
Asegun con el ZCPS11 cay el incidente ya ocuri mga ala 1:40 del Huwebes tarde na apalya del Barangay Mariki, este ciudad.
Base na investigacion del Guardia Costal (Coast Guard), el Speedboat, nombrao como el Fadi Laminusa Express, estaba na tres marias na Barangay Baliwasan y ta conduci prueva na mar (sea trial) cuando derefente ya kema de este makina.
Si Suani y su dos pasajeros ya salta na agua y ya libra canila de ila mga conosidos y parientes ta keda serca na lugar del incidente.
Mga personajes del Guardia Costal quien ya responde na incidente y ya puede apaga con el fuego mga alas 3:30 del tarde.
Base na investigacion cay defecto na makina amo el causa del kema del Speedboat. (B. Garcia, photo courtesy of Coast Guard District Southwestern Mindanao)