Un septuagenario el ya muri na un accidente vehicular aqui na ciudad del Zamboanga, asegun con el policia local del Domingo.
Asegun con el policia local, el accidente ya ocuri mga alas 8:50 del Sabado denoche na Manuel Subdivision, Barangay Mampang, en este ciudad.
El policia ya nombra con el victima como si Matugol Arasad, 76 años el edad y residente del lugar donde ya ocuri el accidente.
Base na investigacion del policia, ta crosa na camino si Arasad cuando ya man bangga conele el un kuliglig que ta maneja si Albastrin Nurilla.
Asegun con el policia, enseguidas ya lleva con Arasad na hospital, pero ya declara conele muerto de doctor.
Si Nurilla y el su kuliglig ta esta bajo’l custodia del Zamboanga City Police Station 6 para el propio disposicion. (B. Garcia)