El presidente del Camara de Representantes Martin Romualdez ya alaba con el mga personajes del 11th Infantry Division (11ID) por el de ila exepcional acomplicimiento na mantencion de paz y istabilidad dentro na de ila lugar de responsibilidad.
Si Romualdez ya hace el alabansa durante su visitada del Jueves na quartel del 11ID na Campo Teofuldo Bautista na Barangay Busbus, Jolo, Sulu.
Si Romualdez ya enfatiza el importancia de permanecer firme na de ila mision, particularmente mientras ta continua sila navega con el desafios en evolucion na region.
“Came na Camara de Representantes ta rendi gracias con todo’l tropas del Alakdan na de ustedes servicio y sacrificio para queda pacifico el provincia de Sulu. Continua lang kita hace el de aton obligacion. Esperansa ustedes cay came na camara ta continua suporta con el de ustedes mando,” si Romualdez ya habla.
Durante su visitada, con Romualdez ya extende una calurosa bienvenida si Major General Ignatius Patrimonio, el comandante del 11ID hunto con el mga oficiales, personajes y empleyado del Alakdan division.
Antes su visitada na Campo Bautista, si Romualdez ya hace tamen visitada de cortesia con Gobernador Abdusakur Tan del provincia de Sulu. (B. Garcia)