Un retirao pulis ya muri myentras su esposa y kuniao ya iri na un incidente de tiro na ciudad de Isabela, provincia de Basilan.
Si Police Lt. Col. Parson Asadil, el hefe del pulisiya na ciudad de Isabela, ya nombra con el muerto retirao pulis como si Renie Tubo, 58 años el edad.
Irido amo si Patricia, el esposa de Tubo, y si Hariberto Diaz, kuniao de Tubo. Admitido sila dos na ospital.
El incidente ya ocuri mga alas 8:10 del Huwebes denoche na Barangay Upper Lanote, ciudad de Isabela.
Base na investigacion, el mga victima ta man istorya na residencia de Tubo cuando ya tira canila el un desconosido persona y enseguidas ya escapa.
Ya lleba con el mga victima de ila vicinos na ospital pero con Tubo ya declara muerto el doctor.
Asegun con Asadil ta continua el investigacion para determina si cosa el motivo y si quien el suspechao na incidente. (B. Garcia)