El Consejo del Ciudad ya aprova del Lunes na terser y final leida con el Ordenanza 2025-02 que ta extende el fecha de terminacion del registracion y renovacion del licencias y permisos de negocios, por medio del electronic Business One-Stop-Shop (eBOSS), para na fin del mes de Enero este año.
El fecha de terminacion del registracion y renovacion del licencias y permisos de negocios esta establicido del Lunes, Enero 20, 2025.
El Consejo del Ciudad ya aprova con el Ordenanza 2025-02 despues que ya pedi el Alcalde John Dalipe para de pronto toma accion con el ordenanza, que ya declara el como urgente.
Na su pedido, si Dalipe ya habla el Ordenanza hay dale bastante tiempo con mga negociantes registra y renova con el de ila licencias y permisos de negocios.
Asegun con Benjie Barredo, el jefe del division de licencias y permisos comerciales, con el extension, nohay sanciones y recargos hay impone na pago del impuesto de negocios y otro honorarios y cargos relatao na negocios.
Si Barredo ya nota, cay bajo el Codigo de Gobierno Local del 1991, todo impuestos locales, tarifas, y cargos debe ser programado dentro del primer 20 dias del Enero o de cada tremestres siguientes, depende na situacion.
Si Barredo ya habla el Consejo del Ciudad, sin embargo, puede extende con el tiempo del pagada de tal impuestos, tarifas o cargos sin recargos o sanciones para algun justificable resones pero solamente por un periodo no mas de seiz meses.
Mientras tanto, ya habla si Barredo el BOSS na Centro Latino na Paseo del Mar hay esta abierto desde alas 8 del aga hasta alas 8 del noche entre semana y alas 8 del aga hasta alas 5 del tarde na mga dias de Sabado, Domingo, y dia de vacation para ayuda facilita y asisti con mga aplicantes de registracion de eBOSS.
Si Barredo ya habla, el mga centro del pagada locao na BOSS-Centro Latino, Oficina del Tesoreria del Ciudad na City Hall y na SM City Mindpro. (B. Garcia)