El pulisiya ya aresta dos personas, incluwido un myembro del Barangay Intelligence Network (BIN), y ya confisca el suma total de P476,000 valor de droga ilegal aqui na ciudad de Zamboanga.
Si Police Colonel Alexander Lorenzo, el Zamboanga City Police Office director, ya nombra con el maga arestao suspechao como canda Momer Macafuji Akari, 39 años, y si Norman Nasilin Sawadjaan, 35 años el edad.
Si Akari un myembro del BIN del Barangay Baliwasan myentras si Sawadjaan amo el numero ocho suspechao high-value individual na entero rehyon.
Asegun con Lorenzo cay con Akari ya aresta na un campanya contra droga ilegal maga alas 2:50 martes tarde na un motel na Barangay Canelar, este ciudad.
Asegun con Lorenzo el maga operativa ya puede confisca na posesion de Akari 50 gramos de suspechao shabu que tiene el cantidad de P340,000, un bag, y P500 markao sen.
Asegun con Lorenzo cay con Sawadjaan ya aresta el combinao operativas del pulisiya y militar na un buy-bust operation maga alas 8:10 martes denoche na Barangay Arena Blanco, este ciudad.
Si Lorenzo ya habla cay ya puede recubri na posesion de Sawadjaan 20 gramos de suspechao shabu que tiene el balor de P136,000 y markao P1,000.
El dos arestao suspechao detenido myentras ta prepara yam aga documentos para el plantada del asunto contra canila dos por violacion del leyes de droga ilegal (B. Garcia) (Photo Courtesy of Zamboanga City Police Office)
