Un myembro del un grupo de criminal quien tiene pendiente orden de aresto el ya aresta maga personajes del pulisiya na provincia del Zamboanga del Sur.
Si Coronel John Francis Encinareal, el director rehyonal del Criminal Investigation and Detection Group (CIDG), ya nombra con el arestao suspechao como si Jay-ar Pangilan alias Diosdado Pantino, Hijo, treynta’y sinco anios el edad y residente del municipio de Siay, Zamboanga Sibugay.
Asegun con Encinareal cay con Pangilan ya aresta maga alas dos del tarde del Sabado na Purok Cadena de Amor, Barangay Poblacion, Margosatubig, Zamboanga del Sur.
Asegun con Encinareal cay si Pangilan un myembro del grupo de criminal consido como el grupo de Balimbingan y alegamente envuelto na matansa de Nojib Taiting del Marso anio dos mil deci-siete na tiangge publico del Margosatubig, Zamboanga del Sur.
Si Encinareal ya habla cay si Pangilan listao como el numero deci-nueve “most wanted person” na municipio del Margosatubig y tiene el pendiente orden de aresto por el crimen de matansa sin piansa ya ase sale el tribunal del San Miguel, Zamboanga del Sur del Otubre sinco anio dos mil veinte.
Si Encinareal ya habla cay si Pangilan ya esconde por dos anios despues que ya comete ele crimen por medio de cambiar desde uno para na otro lugar. (Bong Garcia, Jr.)(Photo Courtesy of Criminal Investigation and Detection Group IX)