Ya recubri mga pulis con seis cajon de cigarillo que ya abandona el un desconosido persona na uno del mga barangay aqui na ciudad de Zamboanga.
Asegun con Police Captain Royland Cordero, el hefe del “City Drug Enforcement Unit (CDEU)” del “Zamboanga City Police Office (ZCPO)”, con el mga cigarillo ya recubri sila mga alas 4:00 del tarde del Lunes na Luluam Homes Subdivision na Barangay Sta. Barbara, este ciudad.
El seis cajon de cigarillo tiene el estimao valor de P78,000.
Asegun con Cordero, ya puede sila columbra con un desconosido persona ta carga con mga cajon de cigarillo myentras ta prepara sila para el possible conducida de un “buy-bust operation” na mencionao subdivision na Barangay Sta. Barbara.
Si Cordero ya habla cay ya abandona el hente con el mga cajon de cigarillo y ya isitindi cuando ya nota este el de ila presencia.
Ya ase apas el mga pulis pero nohay sila alcansa con el desonosido persona cay bien corre este.
Con el seis cajon de cigarillo ya pone bajo na costodiya del Zamboanga City Police Station 11 (ZCPS11) para el propio disposicion. (B. Garcia) (Photo courtesy of CDEU-ZCPO)