Tres tripulantes el ya aresta mientras valor de P3.1 millon contrabando ya confisca mga autoridad aqui na ciudad de Zamboanga, el policia local ya anuncia del Lunes.
Asegun con Police Colonel Alexander Lorenzo, el Zamboanga City Police Office director, con mga contrabando ya confisca mga alas 3:20 del Domingo aga na mar del Barangay Maasin, en este ciudad.
Asegun con Lorenzo, ta man patrulla mga personajes del 2nd Zamboanga City Mobile Force Company (2ZCMFC) cuando ya columbra sila con un jungkung nombrao como el Sitti Hana con tres tripulantes ta navega na mar del Barangay Maasin.
Asegun con Lorenzo, durante el inspeccion, mga personajes del 2ZCMFC ya descubri cay el jungkung ta carga 90 cajon de diferentes clase de cigarillo que tiene el valor de P3,150,000.
Si Lorenzo ya habla ya aresta con el tres tripulantes y ya confisca con el mga cigarillo despues que ya falla sila presenta documentos del de ila cargamento.
Con el tres arestao tripulantes ya nombra si Lorenzo come el siguientes: Mannan Asgari 58, el maestro patron del jungkung; Mashir Asgari, 19; y si Saldi Awalil, 33, todo mga residentes de Maluso, Basilan.
Asegun con Lorenzo el jungkung ta navega para na ciudad de Zamboanga estaba na Jolo, Sulu.
Ek tres tipulantes, el jungkung y mga cajon de cigarillo ya lleva na quartel del 2ZCMFC y esperansao entrega na Buro de Aduana para el propio disposicion. (B. Garcia, photo courtesy of 2ZCMFC)