Ya aresta mga otoridad con un persona tiene pendiente orden de aresto por el asunto de violacion del leyes contra droga ilegal aqui na ciudad de Zamboanga.
Si Police Lieutenant Colonel Raymond Sanson, el hefe del 2nd Zamboanga City Mobile Force Company (2ZCMFC), ya nombra con el arestao persona como si John Gerald Ramillano alias “Small”, 27 años el edad y residente de Barangay Lunzuran, este ciudad.
Asegun con Sanson cay con Ramillano ya aresta mga alas 11:30 del Martes aga na Barangay Tumaga, este ciudad.
Si Ramillano tiene pendiente orden de aresto sin recomendao piansa por el violacion del Comprehensive Dangerous Drugs Act of 2002 que ya dale del Hunyo 13, 2023 el un tribunal de aqui na Zamboanga.
Asegun con Sanson con Ramillano ya detene na carcel del Zamboanga City Police Office. (B. Garcia) (Photo courtesy of 2ZCMFC)