Un persona numero siete mas buscada, quien ta esconde por mas de dos año ya, el ya aresta el mga autoridad na un operacion de aplicacion de ley na provincia del Lanao del Sur, asegun con el policia del Viernes.
Si Police Colonel Robert Daculan, el director del policia na Lanao del Sur, ya identifica con arestao persona mas buscada como si alias Oting, de legal el edad.
Asegun con Daculan, con Oting ya aresta na un operacion del aplicacion de ley por medio na implementacion del un orden de aresto mga alas 4:50 del Jueves tarde na Barangay Basak Malutlut, ciudad de Marawi, provincia del Lanao del Sur.
Si Daculan ya habla, si Oting listao como el numero siete persona mas buscada na provincia del Lanao del Sur y tiene pendiente orden de aresto por el crimen de matansa sin recomendao piansa que ya dale el un corte na ciudad de Cotabato de Abril 6, 2022.
Si Daculan ya habla, si Oting envuelto na matansa del tres personas y irida del otro cuatro na Matanog, Maguindanao del Norte, del Deciember 17, 2020.
Asegun con Daculan, con Oting ya pone bajo’l custodia del Lanao del Sur Provincial Police Office para el propio disposicion. (B. Garcia)