Un persona quien alegaomente ya liquida con un oficial de barangay el ya aresta mga autoridad na provincia del Lanao del Sur, asegun con el Area Police Command-Western Mindanao (APC-WM) del Lunes.
El APC-WM, ya nombra lang con el arestao suspechao como un tal Bong, un residente de Barangay East Marogong, Marogong, Lanao del Sur.
Asegun con el APC-WM, con Bong ya aresta mga pulis mga alas 4:45 del Viernes tarde na Barangay East Marogong na municipio del Marogong.
Asegun con el policia, si Bong tiene pendiente asunto na corte del Lanao por el crimen de matansa.
Asegun con el policia, si Bong envuelto na matansa de un barrio capitan de Lumbac, Lanao del Sur.
El APC-WM ya habla, con Bong ya pone bajo’l custodia na quartel del policia na provincia del Lanao del Sur para el propio disposicion. (B. Garcia)