Tres suspechao “gun runners” el ya aresta mga otoridad na un “entrapment operation” aqui na ciudad de Zamboanga.
Si Police Colonel Alexander Lorenzo, el hefe del Zamboanga City Police Office (ZCPO), ya nombra con el mga arestao suspechao como el siguentes: Almunier Abdula, 38 años el edad; Alikar Buclao, 31; y si Jerry Tarang, 59.
Asegun con Lorenzo con el mga suspechao ya aresta na un entrapment operation mga operativas del pulisiya local bajo el liderato de Police Captain Royland Cordero mga alas 11:37 Huwebes denoche na Sitio Kaputatan, Barangay Putik, este ciudad.
Con el tres suspechao ya aresta despues que ya bende sila un riple M-14 na valor de P136,000 con un secreta del pulisiya local.
Ya puede recubri na posesion del mga suspecho un riple M-14, un bundel de P135,000 “boodle money” que ya pone insima un riyal P1,000 como markao sen.
Asegun con Lorenzo ya detene con el mga arestao suspechao y esperansao planta asunto contra canila. (B. Garcia, photo courtesy of ZCPO)