Mas de P1.6 milyones cantidad de propiedad el ya destrosa na kema del Sabado tarde na puesto del “Burger King” na primer piso del KCC Mall de Zamboanga na Barangay Camino Nuevo, este ciudad.
Asegun con Superintendent Christopher Morales, el fire marshal del Zamboanga City Fire District, cay el kema ya principia na kisame del cusina del Burger King mga alas 4:07 del Sabado tarde.
Asegun con Morales cay dose trak de bombero el ya responde con el incidente de ensendio que ya alcansa terser alarma.
Si Morales ya habla cay ya puede controla mga bombero con el kema mga alas 4:43 del tarde y completamente ya apaga con el fuego mga alas 4:57 del tarde.
Nohay quien ya sinti duele durante el ensendio. Ta investiga pa el bombero si cosa el causa del kema que ya destrosa P1.6 milyones cantidad de propiedad. (B. Garcia, photo courtesy of Zamboanga City Fire District)