Ya honra del Lunes el Police Regional Office-Bangsamoro Autonomous Region (PRO-BAR) con sinco pulis, incluido in official, por el de ila buen acomplismiento na campaña contra droga ilegal na provincia del Maguindanao del Norte.
Asegun con el PRO-BAR, aquellos quien ya recivi Medalya ng Kagalingan amo canda Lieutenant Colonel Edwin Tabora, Senior Master Sergeant Jawardin Saglayan, Staff Sergeant Samad Dimaampao, Staff Sergeant Ramon Endrina, y si Corporal Mohnaem Brie.
Si Police Brigadier General Prexy Tanggawohn, el director del PRO-BAR amo el ya regala medalla con el sinco pulis durante de ceremonia de bandera na Campo Brigadier General Salipada Pendatun na Parang, Maguindanao del Norte.
Asegun con el PRO-BAR, el sinco pulis ya conduci un operacion contra droga del Junio 4 na Barangay Samiento, Parang, Maguindanao del Norte, que ya resulta na aresto de cuatro suspechao, confiscacion de droga ilegal y dos calibre .45 pistola.
Na su mensaje, Si Tanggawohn ya expresa su gratitud con el sinco pulis por el de ila dedicacion y servicio na policia y comunidad. (B. Garcia)