El Police Regional Office-Bangsamoro Autonomous Region (PRO-BAR) ya dale medalla con un irido pulis por su galanteria na campaña contra droga ilegal na provincia de Tawi-Tawi, asegun con el policia del Lunes.
Asegun con el PRO-BAR, el recipiente del Medalya ng Sugatang Magiting (PNP Wounded Personnel Medal), amo si Patrolman Abdulmijir Usman Kali, Jr., del 1405th Regional Mobile Force Company bajo na Regional Mobile Force Battalion 14-B base na provincia de Tawi-Tawi.
Si Police Brigadier General Prexy Tanggawohn, el interino director del PRO-BAR, ya encabesa con el ceremonia de premiacion cuando ya visita le con Kali na un privado hospital aqui na ciudad de Zamboanga del Viernes.
Asegun con el PRO-BAR, si Tanggawohn ya premia medalla con Kali por su valenteria y servicio durante el operacion contra droga na Mercado publico del Bongao, Tawi-Tawi del Jueves.
Si Tanggawohn ya extende tamen ayuda financial con Kali asegurando cay todo su gastos na hospital cubrido ya todo.
Si Kali ya iri mientras dos alegao notorioso distribuidor de droga ilegal el ya muri na un tirahan que ya socede cuando ya gole el mga suspechao el presencia del mga pulis.
El mga pulis ya conduci operacion contra droga despues que ya recivi sila informacion desde un concierne residente cay tiene ta socede vendida de droga ilegal na mercado public del Bongao.
El PRO-BAR ya identifica con el dos muerto distrbuidor de droga ilegal como canda alias Jay y alias Nasir. Ya declara canila muerto el doctor apenas ya llega na hospital.
Con Kali ya lleva na hospital na Bongao y despues ya transferi para na un privado hospital aqui na ciudad de Zamboanga.
El PRO-BAR ya habla el Medalya ng Sugatang Magiting ta servi como un simbolo de valenteria, resiliencia, y inquebrantable dedication na trabajo. (B. Garcia)