El gobierno del ciudad de Zamboanga ya dale P300,000 premio con el policia por el aresto y neutralizacion del cuatro suspechao na incidentes de tiroteo, demostrando el implacable dedicacion con el sector de seguridad para el proteccion del mga vivientes.
El Alcalde John Dalipe ya encabesa con el entrego del premio del Lunes tarde na cuarto de conferencia del Zamboanga City Police Office (ZCPO), como si Police Colonel Kimberly Molitas, el interino director del ZCPO, ya presenta con el dos pistoleros conectao na reciente incidentes de tiroteo.
El otro dos suspechao ya neutraliza si Police Senior Master Sergeant Ryan Mariano durante un operacion encubierta na Barangay Ayala del visperas del año nuevo.
Con el premio de P100 cada uno ya recivi el Criminal Investigation Unit, por medio del jefe si Police Lieutenant Colonel Hartzel Peter Billedo; Zamboanga City Police Station 9 (ZCPS9) por medio del jefe si Police Major Joemar Calud; y, el ZCPS6, por medio del jefe si Police Major Xyronne Caronan.
El mga arestao suspechao que ya presenta si Molitas con Dalipe identificao como si Fernan Tanji Alpha y mubin Tupasan Kalbi.
Asegun con el policia local, si Alpha envuelto na dos reciente incidentes de tiroteo: uno na estacion de gasolina na Barangay San Jose Gusu y el otro na un hardware na Barangay Boalan.
El policia ya habla, si Kalbi implicao na incidente de tiroteo del Deciembre 21, 2024 na Paseo de Bato-Bato, Barangay Arena Blanco.
Si Dalipe ya alaba con el ZCPO por el continuando exito na arestada del mga criminal, reiterando su dedicacion para suporta con el policia local. (B. Garcia)