El mga autoridad ya confisca P450,000 valor de smuggled cigarillo na municipio de Sultan Mastura, provincia de Maguindanao del Norte, asegun con el policia del Sabado.
Asegun con el Police Regional Office-Bangsamoro Autonomous Region (PRO-BAR), con el mga smuggled cigarillo ya confisca del Viernes aga na pantalan de pesca del Barangay Simuay, Sultan Mastura, Maguindanao del Norte.
Asegun con el PRO-BAR, con el mga cigarillo ya confisca despues que un informante ya informa con el policia cay tiene suspechoso bagage el ya hace abaja desde un banca de motor na canto’y apalaya del Barangay Simuay.
Asegun con el PRO-BAR, el mga pulis ya discubri 1,250 reams de cigarillo tapao de lona cuando ya llega sila na canto’y aplaya del Barangay Simuay.
Asegun con el PRO-BAR, el dueño del mga cigarillo ya abandona con el contrabando cuando ya gole con el presencia del mga autoridad.
El PRO-BAR ya habla, con el mga confiscao reams de cigarillo que tiene el valor de P450,000 ya pone bajo’l custodia del policia na municipio de Sultan Mastura.
Asegun con el policia, con el mga confiscao cigarillo hay entrega despues para na Buro de Aduana para el propio disposicion y accion legal. (B. Garcia)