El mga autoridad ya puede confisca valor de P31.5 million contrabando na tres separao operaciones na region, asegun con el policia del Jueves.
Asegun con el policia, el primer conficacion ya hace mga alas 7:30 del Miercoles denoche na Purok 5, Paseo de Parfamco, Barangay Patalon, ciudad del Zamboanga.
Asegun con el policia, valor de P11.1 millon smuggled cigarillo el ya puede recubri na bodega de Aubrey Mohammad na Paseo de Parfamco.
Asegun con el policia, nohay con quien ya aresta siendo ya abandona con el mga cigarillo cuando ya llega el mga pulis.
Con el mga confiscao cigarillo ya lleva na Zamboanga City Police Station 10 y ya entrega na Buro de Aduana para el propio disposicon.
El policia ya habla, valor de P535,984 smuggled cigarillo el ya confisca mga alas 6:30 del Miercoles denoche na Barangay Poblacion, Midsalip, Zamboanga del Sur.
Con el diferentes clase de cigarillo ya confisca el mga autoridad durante el conducida de inspeccion na mga tienda na Barangay Poblacion, Midsalip.
Con el mga confisca cigarillo ya lleva na quertel del policia del municipio de Midsalip para el propio disposicion.
Na otro separao operacion, el mga pulis ya confisca valor de P19.8 millon smuggled cigarillo na vicinidad del isla de Sinunuc, ciudad de Zamboanga mga alas 11:45 del Miercoles denoche.
El mga personajes del 2nd Zamboanga City Mobile Force Company ta conduci patrulla cuando ya columbra sila con un junking ta transporta mga smuggled cigarillo.
Asegun con el policia, ya confisca con el mga cigarillo y ya aresta con el siete tripulantes del jungkung despues que ya falla sila presenta documentos del de ila cargamento.
Con el mga tripulantes y confiscao smuggld cigarillo ya lleva na Zamboanga City Police Station 4 y ya entrega na Buro de Aduana para el documentacion y propio disposicion. (B. Garcia)