El mga autoridad ya confisca valor de P1.2 millon contrabando na provincia de Tawi-Tawi, asegun con el policia del Domingo.
Asegun con el Tawi-Tawi Maritime Police Station (MARPSTA), con el contrabando ya confisca na un lugar costera del Sabado na Barangay Lamion, Bongao, el capital del provincia de Tawi-Tawi.
Asegun con el policia, con el contrabando que ta consisti mga cigarillo, ya puede confisca despues que ya recivi el Tawi-Tawi MARPSTA un infromacion cay tiene un jungkung ta transporta mga cargamento y ta descarga na un bodega na costera del Barangay Lamion.
El mga personajes del Tawi-Tawi MARPSTA, na presencia del un Kagawad del Barangay Lamion, ya confisca desde’l bodega 85 cajon y 163 paquetes de diferentes clase de smuggled cigarillo que tiene el valor de P1,236,160.
Sin embargo, a pesar del esfuerzo extensivo del mga personajes del Tawi-Tawi MARPSTA de buscar y aresta con aquellos responsible, nohay sila encontra con el dueño y encargao del bodega.
Asegun con el policia, con el mga confiscao contrabando ya lleva para na quartel del 1st Tawi-Tawi Provincial Mobile Force Company na Campo Alejandro Suarez, na Bongao, para el propio documentacion antes que hay entrega con el mga confiscao cigarillo na Buro de Aduana. (B. Garcia)