El mga autoridad ya aresta un gran traficante de droga ilegal y ya confisca valor de P6.8 millones droga ilegal na un operacion contra droga na provincia del Maguindanao del Norte, asegun con el policia del Miercoles.
El Police Regional Office-Bangsamoro Autonomous Region (PRO-BAR) ya identifica lang con el arestao gran traficante de droga ilegal como si alias Mors.
Asegun con el PRO-BAR, con Mors ya aresta na un operacion de compra busto na Barangay Awang, Datu Odin Sinsuat, Maguindanao del Norte, del Martes.
Asegun con el policia, el inicial lugar donde hay man mirahan era si Mors y el pretendedor comprador de droga ilegal amo na Barangay Salimbao, Sultan Kudarat, Maguindano del Norte.
Sin embargo, ya man alang-alang si Mors poreso ya insisti el pretendedor comprador y ya conforma reloca el lugar de transaccion para na Barangay Awang, Datu Odin Sinsuat, Maguindanao del Norte.
Asegun con el PRO-BAR, despues que ya completa el transaccion de droga ilegal, el pretendedor comprador ya dale señas con su mga compañeros y enseguidas ya agarra con Mor que ya resulta na aresto del suspechao.
Pero, asegun con el policia, el dos compañeros de Mors ya puede escapa.
Asegun con el policia, ya puede recubri na posesion de Mors un kilo de suspechao shabu que tiene el valor de P6,800,000, un saco de sinco kilo arroz, dinero de compra busto, sinco diferentes clase de tarjetas de identificacion, y un vehiculo.
Asegun con el PRO-BAR, con Mors ya lleva na quartel del policia na municipio del Sultan Kudarat en preparacion del plantada del asunto contra conele.
Mientras tanto, si Police Brigadier General Prexy Tanggawohn, el interino director del PRO-BAR, ya alaba con el mga operativas del policia por el exitoso arresto del un gran traficante de droga ilegal.
Si Tanggawohn ya emfatiza cay el aresto de Mors es un claro señal cay todo’l mga traficantes de droga, ambos pequeña y gran escala, cay el mga autoridades hay persigue canila implacablemente hasta hay eradica con el comercio de droga ilegal na region. (B. Garcia)