Un persona mas buscada na provincia del Zamboanga del Sur el ya aresta el mga autoridad na un operacion de aplicacion de ley na ciudad de Cagayan de Oro, asegun con el policia del Jueves.
El mando regional del policia, o Police Regional Office-9 (PRO-9), ya identifica con el arestao persona mas buscada como si Andy Gumaga Lahagan, de legal el edad y residente de Lapuyan, Zamboanga del Sur.
Asegun con el policia, con Lahagan ya aresta na un operacion de aplicacion de ley por medio na implementacion de un orden de aresto mga alas 8:21 del Martes denoche na calle Julio Pacana, Barangay Puntod, Ciudad de Cagayan de Oro.
Asegun con el policia, si Lahagan tiene pendiente orden de aresto sin recomendao piansa por el crimen de nueve cuentas abuso carnal de un menor de edad que ya dale el un corte na municipio de San Miguel, Zamboanga del Sur.
Asegun con el policia, con Lahagan enseguidas ya lleva na cuartel del pulis na ciudad de Cagayan del Oro para el propio disposicion.
Asegun con el policia, el aresto de Lahagan es el resulta del esfuerzos y coordinacion entre el mga pulis de Lapuyan, Zamboanga del Sur y ciudad de Cagayan de Oro. (B. Garcia)