Sinco suspechao el ya aresta y valor de P630,000 contrabando el ya confisca el mga autoridad na un operacion de aplicacion de ley na provincia del Maguindanao del Norte, asegun con policia del Viernes.
Asegun con Police Brigadier General Prexy Tanggawohn, el interino director del Police Regional Office-Bangsamoro Autonomous Region (PRO-BAR), con el contrabando compuesto de smuggled cigarillo ya confisca del Miercoles na Barangay Nuro, Upi, Maguindanao del Norte.
Si Tanggawohn ya habla, el mga pulis ta conduci checkpoint cuando ya hace sila para dos vehiculos con abordo sinco personas para inspecciona.
Asegun con Tanggawohn, base na inspeccion, el uno del dos vehiculos ta contene 40 y el otro ta contene 20 cajon de smuggled cigarillos.
Nohay mas nombra el policia con el sinco personas ya cogi sila ta transporta con el mga smuggled cigarillo pendiente el plantada del asunto contra canila.
Asegun con Tanggawohn, el barrio capitan del Nuro ya man testigo cuando ya hace inventario el mga pulis con el mga confiscao smuggled cigarillo na lugar donde ya confisca con el mga contrabando.
Si Tanggawohn ya habla, con el mga confiscao smuggled cigarillo hunto con el sinco arestao personas ya lleva na quartel del policia na municipio del Upi para el propio disposicion.
Si Tanggawohn ya comenda con el mga personajes del policia por el de ila inquebrantable dedicacion para eradica con el actividades de smuggling na Bangsamoro Autonomous Region in Muslim Mindanao. (B. Garcia)