Cuatro personas listao como mga personas mas buscada na nivel municipal el ya aresta el mga autoridad na un operacion de aplicacion de ley na provincia del Tawi-Tawi, asegun con el policia del Martes.
El policia ya nombra con el mga arestao personas como canda alias Kim, 47 años el edad; alias Ronie, 35; alias Bong, 31; y si alias Tom, 35 años el edad.
Asegun con el policia, con el cuatro suspechao ya aresta na un operacion de aplicacion de ley por medio de implementacion de un orden de aresto del Domingo na Barangay Tabunan, Panglima Sugala, Tawi-Tawi.
Asegun con el policia, el cuatro arestao suspechao tiene pendiente orden de aresto por el crimen de homicidio con recomendao piansa de P40,000 cada uno que ya dale el un corte na Bongao, Tawi-Tawi del Julio 31, 2014.
Asegun con el policia, con el mga arestao personas ya lleva na quartel del Criminal Investigation and Detection Group na Tawi-Tawi para el documentacion y propio disposicion.
Asegun con el policia de Tawi-Tawi, hay continua sila conduci operaciones para cogi con el mga gentes que ta viola el ley para el ordenao, pacifico, y prosperoso nuevo Pilipinas. (B. Garcia)