El mga autoridad ya aresta un suspechao y ya confisca mas del media millon droga ilegal na un operacion contra droga na ciudad de Zamboanga, asegun con el policia local del Viernes.
Si Police Colonel Kimberly Molitas, el director del Zamboanga City Police Office (ZCPO), nohay mas nombra con el arestao suspechao quien un hombre y tiene el edad de 23 años.
Asegun con Molitas, con el suspechao ya aresta mga alas 7:45 del Miercoles denoche na Phase 1, Sitio Asinan, Barangay Kasanyangan, ciudad de Zamboanga.
Asegun con Molitas, ya confisca na posesion del suspechao 80 gramos de suspechao shabu enpaquetao na cuatro termosellada transparente sobrecitos plastico que tiene el valor de P544,000.
Con el mga recubrido droga ilegal y el arestao suspechao ya lleva na Zamboanga City Police Station 6 para el propio disposicion.
Asegun con Molitas, el operacion contra droga ilegal ta demostra el dedicacion del ZCPO y mga aliado agencias del gobierno na sin descanso peleya contra droga ilegal na ciudad de Zamboanga. (B. Garcia)