El mga autoridad ya confisca P2.87 millones valor de smuggled cigarillo na un operacion contra smuggling na provincia del Sulu, asegun con con el policia del Domingo. Asegun con el Sulu Maritime Police Station (Sulu MARPSTA), con el mga smuggled cigarillo ya confisca del Viernes na canto’y aplaya del Sitio Subah Datu, Barangay Buansa, Indanan, Sulu.
Asegun con el Sulu MARPSTA, nohay con quien ya puede aresta por causa el dueño y el mga gente quien ta transporta con el mga smuggled cigarillo ya escapa cuando ya gole sila el llegada del mga pulis na lugar.
Pero, asegun con el policia, el mga suspechao ya puede pa carga cuantos cajon de cigarillo para na de ila banca de motor antes ya escapa. El policia ya confisca total 50 cajon de smuggled cigarillo que tiene el valor de P2,875,000.
Base na investigacion, con el mga smuggled cigarillo esperansao distribui na diferente municipios na Sulu usando diutay banca de motor.
Asegun con el Sulu MARPSTA, ya continua de ila investigacion para identifica con el dueño del mga contraband. Con el mga confiscao smuggled cigarillo ya lleva na cuartel del Sulu MARPSTA para el propio disposicion. (B. Garcia)