El mga autoridad, na un esfuerzo concertado para eradica actividades de contrabando, ya confisca valor de P399,000 cigarillo na provincia del Sulu, asegun con el policia del Lunes.
Asegun con el Police Regional Office-Bangsamoro Autonomous Region (PRO-BAR), con el mga smuggled cigarillo ya confisca del Domingo na Barangay Tandu Bagua, Patikul, Sulu.
Asegun con el PRO-BAR, el policia del Patikul ya conduci campaña contra smuggling despues que ya recivi informacion desde un concierne residente cay tiene mga abandonao cajon cigarillo na canto’y aplaya del Barangay Tandu Bagua.
El PRO-BAR ya habla, el mga pulis de Patikul ya recubri siete cajon de cigarillo que tiene el estimao valor de P399,000.
El policia ta acre cay con el siete cajon de cigarillo ya déjà el mga desconocidos transportador usando vinta, probablemente intendido para transporta apuera del provincia de Sulu.
Asegun con el PRO-BAR, con el mga confiscao smuggled cigarillo ya pone bajo’l custodia del policia na municipio del Patikul y hay entrega con este na Buro de Aduana para el propio disposicion.
Ademas, si Police Brigadier General Prexy Tanggawohn, el interino director del PRO-BAR, ya alaba con el policia de Patikul por el de ila exitoso confiscacion del mga smuggled cigarillo.
Si Tanggawohn ya empatiza el importancia del operacion na continuando esfuerzos de enforsa’r el ley para combate con el smuggling y proteje con el economia local. (B. Garcia)