El mga autoridad ya confisca valor de P2.3 millones smuggled cigarillo na provincia del Zamboanga del Sur, asegun con el policia del Miercoles.
Asegun con el Philippine National Police-Maritime Group (PNP-MG), con el mga smuggled cigarillo ya confisca del Martes na Barangay Sugod, Tukuran, Zamboanga del Sur.
Asegun con el PNP-MG, mga personajes del Zamboanga del Sur Maritime Police Station (MARPSTA), hunto con el otro mga unidades del policia, ya enderesa para na Barangay Sugod, Tukuran, despues que ya recivi sila informacion cay tiene quien ta descarga mga cajon de cigarillo na canto’y aplaya del mencionao barrio.
Asegun con el PNP-MG, nohay con quien ya aresta siendo el mga hente ta transporta con el mga smuggled cigarillo ya istindi para na diferentes direccion cuando ya gole sila con el llegada del mga pulis.
El mga pulis ya confisca 40 cajon de smuggled cigarillo que tiene el valor de P2,343,000.
El el mga confiscao contrabandos ya pone bajo’l custodia del Zamboanga del Sur MARPSTA para el propio disposicion.
El Zamboanga del Sur MARPSTA, en coordinacion con otro mga unidades del policia, ta conduci investigacion para determina si quien el dueño del mga confiscao smuggled cigarillo. (B. Garcia)